
Coronavirus	Lexislación	Delegados	Actuación preventiva	Riscos específicos	Boletín CIG - Saúde Laboral	Asesoramento técnico

Boletín CIG-Saúde Laboral Nº 68

26-06-2026 - Gabinete Técnico Confederal de Saúde Laboral

A aprobación da Lei 2/2025 de 29 de abril pola que se modifican o Estatuto das persoas traballadoras en materia de extinción do contrato de traballo por incapacidade permanente e a Lei Xeral da Seguridade Social en materia de incapacidade permanente, supón un importante avance na protección dos dereitos laborais das persoas con discapacidade, atendendo, deste xeito, a algunhas das obrigacións que sobre esta materia tiña pendentes o Estado español. A nova norma estabelece que, cando a unha persoa traballadora se lle declara unha incapacidade permanente absoluta, total, ou gran incapacidade, o contrato non se extingue automaticamente e obriga á empresa a valorar a realización de axustes razoables ou se existe un posto vacante e compatible coa nova situación da persoa traballadora. A extinción do contrato só será posible en caso da imposibilidade de realizar axustes razoables sen que supoñan “carga excesiva”, por inexistencia dun posto vacante compatible coa situación da persoa traballadora ou que a pesares da existencia de posto vacante, a persoa traballadora rexeite razoadamente a recolocación ofrecida.

Novo método para determinar a exposición das persoas traballadoras a fibras de amianto

25-06-2026 - INSST

Este novo Método de Toma de Mostra e Análise MTA/MA-051/A26 proponse como novo método para determinar a exposición das persoas traballadoras a fibras de amianto en substitución do dispoñible anteriormente MTA/MA-051/A04. A exposición ao amianto require unha especial atención, dado os seus importantes efectos adversos para a saúde dos traballadores e traballadoras. A pesar da prohibición do seu uso e fabricación, aínda está moi presente na nosa contorna, en especial en edificios e ruínas industriais, baixantes, conducións, illamentos, etc. En aras a unha maior protección da poboación exposta, recentemente estabeleceuse un novo valor límite de exposición (VLA). A adopción deste novo valor límite conleva a necesaria modificación do método para medir esta exposición.

Convenio sobre o traballo decente na economía de plataformas

23-06-2026 - OIT

A 114ª Conferencia Internacional do Traballo da Organización Internacional do Traballo, celebrada en Xenebra este mes de xuño, aprobou o Convenio sobre a Economía Decente no Traballo de Plataformas, destinado a reforzar a protección das persoas que traballan a través de plataformas dixitais. O novo convenio supón un paso significativo na protección das persoas traballadoras de plataformas dixitais ao establecer garantías para o respecto dos seus dereitos laborais, entre eles os relacionados coa seguridade e saúde no traballo, o recoñecemento da súa situación laboral e o acceso a información sobre o impacto que os sistemas dixitais teñen na relación de traballo.

Seguridade laboral e Intelixencia artificial: cando a IA relaxa a prevención

22-06-2026 - International Journal of Industrial Ergonomics

Un estudo publicado na revista International Journal of Industrial Ergonomics (2026) advirte que a confianza excesiva na intelixencia artificial nas contornas industriais pode aumentar o risco laboral cando os algoritmos erran. A investigación sinala que o "sesgo de automatización" e a "desconexión moral" levan aos profesionais a relaxar a súa supervisión, confiando máis na máquina que no seu propio criterio, aínda que a experiencia profesional actúa como factor protector. A prevención de riscos esixe que a IA sexa tratada como unha ferramenta de apoio suxeita a revisión humana constante, fomentando o pensamento crítico sobre as recomendacións automatizadas.

No mar, cada detalle conta: nova campaña para reforzar a cultura da seguridade na pesca

19-06-2026 - CNSST

A Comisión Nacional de Seguridade e Saúde no Traballo (CNSST), no marco da Estratexia Española de Seguridade e Saúde no Traballo 2023-2027, impulsa a campaña "No mar, cada detalle conta", unha iniciativa de sensibilización dirixida ao sector pesqueiro co obxectivo de reforzar a cultura da seguridade a bordo mediante mensaxes claras, visuais e adaptadas á realidade diaria do traballo no mar. A campaña diríxese a todas as persoas e entidades implicadas na actividade pesqueira, incluíndo tripulacións, empresas armadoras, servizos de prevención, organizacións do sector e administracións.

Guía para a aplicación do protocolo de actuación fronte a situacións de violencia e acoso no servizo do fogar familiar

18-06-2026 - INSST

Esta Guía do INSST explica o sentido e o alcance práctico de cada elemento do Protocolo de actuación frente a situacións de violencia e acoso no servizo do fogar familiar, despexa dúbidas sobre a súa interpretación e ofrece exemplos reais que axudan a recoñecer cando se está ante unha situación de violencia ou acoso -incluídas as súas formas máis específicas, como o acoso sexual ou o motivado pola orixe, a nacionalidade, o sexo, a identidade ou a orientación sexual- e como responder ante ela de forma adecuada. A Guía está dirixida tanto ás traballadoras como ás persoas empregadoras, co obxectivo de converter o marco normativo nunha referencia clara e práctica para o día a día.

Accidente grave por caída en altura dende a pinza dunha carretilla elevadora

17-06-2026 - INVASSAT

O INVASSAT publicou unha nova ficha de investigación de accidentes, titulada: Accidente grave por caída en altura dende a pinza dunha carretilla elevadora. Estas fichas elabóranse a partir de casos reais analizados polo persoal técnico deste Instituto e teñen como obxectivo principal poñer de manifesto as circunstancias nas cales se producen os accidentes, así como identificar as súas causas máis relevantes e as medidas preventivas ou correctivas a adoptar, contribuíndo así á mellora da seguridade e a saúde no traballo.

Diversidade da poboación activa e riscos psicosociais: cara a lugares de traballo máis saudables e inclusivos

16-06-2026 - EU-OSHA

O informe da EU-OSHA examina estes riscos no conxunto dunha poboación activa ampla e diversa, como as persoas LGTBIQ, as mulleres, os migrantes, as persoas traballadoras de minoría negra e doutras orixes étnicas, as persoas con discapacidade ou enfermidades crónicas, as persoas traballadoras máis novas e as de maior idade, así como as que teñen un baixo nivel socioeconómico. A publicación transmite unha mensaxe clara: integrar a diversidade, a igualdade e a inclusión nas estratexias de seguridade e saúde no traballo é fundamental para crear lugares de traballo máis saudables e resilientes para todo o mundo

Índice de incidencia de accidentes de traballo con baixa por sector e gravidade e por CCAA. MAIO 2025 ABRIL 2026

15-06-2026 - INSST

Comparativa por sector e gravidade e por Comunidades Autónomas do Índice de incidencia de accidentes de traballo que causaron baixa no período comprendido entre MAIO 2025 ABRIL 2026.

Campaña do ISSGA no sector vitivinícola

12-06-2026 - ISSGA

O obxectivo desta campaña o ISSGA é difundir e sensibilizar da importancia da prevención de riscos laborais no sector vitivinícola coa presentación actualizada da documentación técnica sobre o traballo na viña, na vendima e na adega nas que, dun xeito moi gráfico e visual, pódense identificar os riscos laborais e medidas preventivas asociados a estes traballos que permitan tanto unha diminución da sinistralidade laboral como a mellora das condicións de traballo das persoas empregadas nese sector.

Recibe as novas do noso boletín dixital


PRL Sectorial

Formación

I+D+i

Datos estatísticos