Repertorio de recomendacións prácticas sobre seguridade e saúde na construción

15-03-2023 - OIT

Este repertorio de recomendacións prácticas revisado, -que substitúe a un repertorio anterior que foi adoptado en 1992 e considerado obsoleto á luz dos cambios producidos nos últimos decenios nas prácticas e condicións laborais no sector da construción- ten en conta novos ámbitos no sector que requiren prácticas melloradas en materia de seguridade e saúde e outras medidas de protección. A finalidade do presente repertorio é dar orientacións útiles para que sexan utilizadas por todas aquelas persoas, tanto do sector público como do sector privado, que teñan obrigacións, responsabilidades, deberes e dereitos en materia de seguridade e saúde na construción

Este repertorio debería contribuír a mellorar a seguridade e saúde no sector da construción, no contexto do desenvolvemento sostible, mediante:

Ø a promoción dunha aplicación efectiva de medidas de prevención;
Ø a prevención ou redución de lesións, enfermidades e doenzas profesionais, e sucesos perigosos derivados do traballo nas actividades de construción;
Ø a garantía de que se indemnice a todo traballador vítima dun accidente do traballo ou que sofre unha enfermidade profesional para compensar a perda de ingresos resultante do accidente do traballo ou da enfermidade profesional, así como os custos da asistencia médica e dos servizos conexos necesarios para que o traballador manteña, mellore e recupere a súa saúde;
Ø a garantía da planificación, a adquisición, o deseño e a execución convenientes de obras de construción
Ø a formulación e aplicación de principios e unha política nacional coherente en materia de SST e de benestar dos traballadores e as súas organizacións para mellorar a SST na construción, así como sobre a protección do medio ambiente xeneral de traballo
Ø o fomento dunha consulta e cooperación efectivas en consonancia coas normas de SST da OIT entre os Gobernos, os empregadores, os traballadores e as súas organizacións e representantes, así como as actividades empresariais, a fin de mellorar a SST na construción;
Ø a orientación, en consonancia cos instrumentos da OIT, sobre as respectivas funcións, obrigacións, responsabilidades, deberes e dereitos de todos os actores implicados nas actividades de construción no relativo aos perigos no lugar de traballo;
Ø a mellora da xestión dos riscos para a SST en cada lugar de traballo mediante a aplicación e a integración de sistemas coherentes de xestión da SST, e
Ø a mellora dos coñecementos e as competencias en materia de SST na construción.

O presente repertorio tamén contén información práctica complementaria e pautas para o cumprimento das disposicións do Convenio sobre seguridade e saúde na construción, 1988 (núm. 167), e para a aplicación da Recomendación sobre seguridade e saúde na construción, 1988 (núm. 175). Así mesmo, deberíase ter en conta o disposto noutros instrumentos pertinentes da OIT, incluídos convenios, protocolos, recomendacións, repertorios de recomendacións prácticas e directrices. A bibliografía que figura ao final do repertorio contén unha lista destes instrumentos.

Ligazón ao Repertorio de recomendacións prácticas da OIT "Seguridade e saúde na construción"