
Coronavirus	Lexislación	Delegados	Actuación preventiva	Riscos específicos	Boletín CIG - Saúde Laboral	Asesoramento técnico

Pasamento do compañeiro Antolín Alcántara Álvarez

28-05-2026 - GABINETE TÉCNICO CONFEDERAL DE SAÚDE LABORAL - CIG

Na pasada noite finou o noso querido e prezado compañeiro Antolín Alcántara Álvarez, durante moitos anos Secretario Confederal de Saúde Laboral da CIG, exemplo excelso de compañerismo, honestidade, compromiso, humanidade e disposición para axudar sen límites a aqueles que máis o necesitaban. Sempre estarás na nosa memoria compañeiro.

Boletín CIG Saúde Laboral Nº 67. Monográfico sector construción

26-05-2026 - Gabinete Técnico Confederal de Saúde Laboral

A vixilancia sanitaria específica das persoas traballadoras expostas a vibracións no sector da construción é unha ferramenta preventiva esencial para protexer a saúde, a capacidade laboral e a calidade de vida do cadro de persoal. Vai máis aló dun trámite administrativo: conecta a avaliación técnica da exposición con intervencións médicas, organizativas e formativas, permitindo detectar efectos precoces, avaliar a eficacia das medidas de control e orientar actuacións que eviten danos irreversibles. A importancia da vixilancia da saúde en materia de vibracións é especialmente importante no sector da construción debido a unha alta prevalencia de exposición, en tarefas con uso de martelos pneumáticos, compactadores, serras e plataformas que xeran vibracións; efectos acumulativos, os danos por vibración adoitan ser crónicos e progresivos; impacto funcional e socioeconómico, por perda de destreza, dor crónica e posibles incapacidades; limitacións de control técnico en obra: a imposibilidade de eliminar totalmente a exposición en moitos procesos fai que a vixilancia da saúde sexa un compoñente imprescindible da prevención.

Brechas entre mulleres e homes no ámbito laboral: 1º trimestre 2026

28-05-2026 - INSTITUTO DAS MULLERES-MINISTERIO DE IGUALDADE

Segundo a infografía do primeiro trimestre de 2026 publicada polo Instituto das Mulleres as tasas de actividade, emprego e paro das mulleres son significativamente peores que as dos homes. A parcialidade segue afectando en maior medida ás mulleres. A distribución de mulleres e homes por ramas de actividade, mostra a segregación horizontal que aínda persiste no mercado laboral e as mulleres teñen unha maior presencia en sevizos sanitarios, educativos, de coidados e organismos extraterritoriais.

Escaleiras fixas: medidas preventivas, elementos que as compoñen, tipos e principais riscos

27-05-2026 - UMIVALE ACTIVA

As escaleiras fixas son elementos construtivos que nos atopamos en moitos lugares de traballo para superar diferentes niveis. Con estes materiais divulgativos Umivale Activa proporciona información sobre os tipos que existen e elementos que as compoñen, principais riscos derivados do seu uso e medidas preventivas para evitar accidentes durante o seu uso.

Nova sección web da EU-OSHA: O cancro e o traballo

25-05-2026 - Axencia Europea para a Seguridade e a Saúde no Traballo

O cancro segue sendo a principal causa de morte relacionada co traballo na UE, con 100.000 falecementos ao ano, e expón a millóns de persoas traballadoras a factores de risco de cancro no seu traballo diario. Con ocasión da Semana Europea contra o Cancro 2026, a nova sección web temática da EU-OSHA presenta datos sobre o cancro relacionado co traballo e unha visión xeral da acción da UE en materia de prevención.

Tríptico sobre nanomateriais

22-05-2026 - ISSGA

A través deste tríptico o ISSGA quere dar visibilidade ao portal temático sobre PRL e nanomateriais co obxectivo de transferir coñecemento científico-técnico contrastado sobre os riscos derivados da exposición e sobre como abordar a PRL no traballo con nanomateriais.

Riscos da exposición a isopreno

21-05-2026 - S.T.O.P. CARCINOGENS AT WORK

Calcúlase que 10.539 persoas traballadoras da UE poden estar expostos ao isopreno. Nos lugares de traballo onde se produce ou utiliza isopreno, a exposición pode producirse principalmente por inhalación de vapores e por contacto coa pel, pero a absorción cutánea considérase insignificante. Segundo CLP, o isopreno está clasificado como Canceríxeno de categoría 1B (H350: Pode causar cancro). Unha exposición crónica e elevada pode provocar cancro de fígado como principal efecto, pero tamén anemia, dexeneración do epitelio olfativo (o tecido do interior da cavidade nasal que intervén na percepción dos cheiros) e dexeneración da substancia branca da medula espiñal.

Retroactividade para valorar os danos por amianto

20-05-2026 - SENTENZA TRIBUNAL SUPREMO

A sentenza do Tribunal Supremo (Sala I) 951/2025, do 17 de xuño, introduciu un cambio transcendental na xurisprudencia ao permitir a aplicación orientadora do baremo de valoración de danos estabelecido pola Lei 35/2015, do 22 de setembro, para cuantificar indemnizacións por prexuízos derivados da exposición ao amianto, mesmo en casos ocorridos antes da entrada en vigor da devandita norma. Este fallo, que aborda un caso de danos sufridos por un traballador dunha fábrica debido á inhalación de amianto, rompe coa tradición xurisprudencial que limitaba a aplicación do baremo ao marco legal vixente no momento do dano.

Guía para a xestión segura de medicamentos perigosos no traballo

19-05-2026 - COMISIÓN EUROPEA

Esta guía ten por obxecto ofrecer unha visión xeral das prácticas correctas dispoñibles e métodos prácticos para reducir a exposición das persoas traballadoras aos Medicamentos Perigosos -MP-. Está deseñada para todos os tipos de organizacións, independentemente do seu tamaño ou de se son de carácter público ou privado, e para todas as fases do ciclo de vida dos MP. Tamén é aplicable ás instalacións que participen en ensaios clínicos. Non ten carácter vinculante e se concebiu para ser utilizada polos Estados membros e as organizacións rexionais e locais para sustentar os seus enfoques con respecto á protección das persoas traballadoras contra os produtos perigosos. Baséase en lexislación europea en vigor.

O INSST publica a Guía Técnica para a prevención de riscos laborais no servizo do fogar familiar e o Protocolo de actuación fronte a violencia e acoso no servizo do fogar familiar

15-05-2026 - INSST

O Instituto Nacional de Seguridade e Saúde no Traballo, en coordinación co Ministerio de Traballo e Economía Social, elaborou a Guía Técnica de aplicación do Real Decreto 893/2024, do 10 de setembro, polo que se regula a protección da seguridade e a saúde no ámbito do servizo do fogar familiar; así como o Protocolo de actuación fronte a situacións de violencia e acoso no servizo do fogar familiar, en cumprimento das disposicións do citado real decreto.

Recibe as novas do noso boletín dixital


PRL Sectorial

Formación

I+D+i

Datos estatísticos