Co financiamento de:
/ Igualdade

Segundo a Universitat Oberta de Catalunya (OUC), os elementos do entorno laboral que causan estrés a homes e mulleres son distintos

29-03-2019 - Universitat Oberta de Catalunya

Dende a Universitat Oberta de Catalunya , Eva Rimbau, profesora de estudos de Economía e Empresa e experta en RRHH, concretou cales son eses factores estresantes que afectan de maneira distinta aos traballadores/as en función do seu sexo.

No caso das mulleres, un deses elementos é o dobre rol que teñen que xogar no fogar e no traballo, moi vinculado aos roles de xénero da sociedade e á influencia das expectativas sociais.

Este dobre rol reflíctese nunha carga de traballo máis elevada para as mulleres que para os homes, xa que á súa dedicación ao traballo retribuído únese o traballo doméstico non retribuído. Tratar de equilibrar as responsabilidades do traballo remunerado e do non remunerado conduce, a miúdo, a situacións de tensións, depresión e fatiga, e pode resultar especialmente problemático cando o salario é baixo e faltan servizos sociais e de axuda.

Outro factor de tensión é a discriminación por xénero reflectida en salarios inferiores por igualdade de responsabilidades, o muro da maternidade e o teito de cristal (barreira invisible que impide ás mulleres acceder ás posicións máis altas da xerarquía organizativa).

Ademais, as mulleres que están soas en contornas laborais ocupadas unicamente por homes (profesións específicas ou altos niveis directivos) poden converterse en “exemplos simbólicos” (en inglés,  tokenism) e sufrir estereotipos e discriminación, poden sentirse soas e ser excluídas das redes informais que apoian aos homes.

Así mesmo,  Rimbau engade á lista de elementos  estresantes o risco de acoso sexual e de comportamentos sociais sexuais que non son acoso (flirteo, chistes ou comentarios sexuais) pero que tamén xeran tensión e malestar.

No caso dos homes, os elementos da contorna laboral que apunta  Rimbau que poden causar tensión son, por exemplo, as longas xornadas laborais e as viaxes de traballo, que lles quitan tempo para desenvolver a relación cos seus fillos.

Tamén a presión para cumprir os valores da “masculinidade corporativa”; é dicir, espérase que os homes sexan competitivos, obxectivos, dispostos á confrontación, lóxicos e orientados ás tarefas. Pídeselles tamén que consideren o traballo como o rol máis importante da vida e aléntase a adición ao traballo. Todo iso xéralles unha excesiva preocupación por alcanzar estes valores, o que lles comporta un gran risco para a saúde.

Medidas para reducir o estrés tendo en conta o xénero

A experta da  UOC constata que poucas empresas teñen programas para reducir o estrés que teñan en conta o xénero, propoñendo algunhas medidas que poderían levar a cabo.

En canto ás mulleres,  Rimbau propón crear programas para eliminar a brecha de xénero nas retribucións, realizar auditorías para garantir que as mulleres non estean en desvantaxe en canto a oportunidades de formación e desenvolvemento ou poñer en marcha accións de  mentoría (mentoring) para ofrecer apoio social.

En relación cos homes,  Rimbau suxire deseñar intervencións orientadas a diminuír a tensión do rol, axudándolles a explorar o seu propio desenvolvemento emocional, ou pensar medidas para axudarlles a descubrir as limitacións da “masculinidade corporativa” e a desenvolver un enfoque máis equilibrado da vida.

Para Rimbau, facilitar a conciliación entre vida laboral e familiar tamén sería unha actuación que apoiaría esta revisión dos roles masculinos, e, por tanto, reduciría o estrés dos homes.

Fonte:  RRHH  press

Empregamos cookies de terceiros para xenerar estatísticas da audiencia (GOOGLE ANALITICS), para o traductor de idiomas (GOOGLE), acollido a “Privacy Shield”.
Se continuas navegando estarás aceitando o seu emprego. Aceptar | Mais información
Confederación Intersindical Galega - Miguel Ferro Caaveiro 10, Santiago de Compostela Versión anterior da páxina Foros Biblioteca Privacidade RSS