O goberno británico anuncia a derogación de entre 3.000 a 6.000 normas en materia de saúde e seguridade laboral.

Así mesmo comprometeu a abolición das inspeccións relacionadas coa seguridade e saúde laboral, salvo en empresas que realizan as súas actividades en sectores de risco como construción ou enerxía ou naquelas que presenten un pobre rexistro de rendemento. Segundo un representante do goberno o obxectivo é conseguir que "os empresarios se centren no crecemento e na creación de postos de traballo sen estar atados á burocracia".

A Administración británica, a través do organismo competente en materia de seguridade e saúde laboral (HSE, Health and Safety Executive), iniciou antes do verán, un proceso para simplificar os requisitos das empresas respecto á notificación de accidentes e enfermidades.

Como é habitual por parte dos organismos británicos, abriuse un período de consulta cos axentes implicados. En setembro publicouse o documento oficial (pendente de aprobar) que recolle os cambios a aplicar na normativa británica para a comunicación de accidentes e enfermidades profesionais (RIDDOR).

O obxectivo do executivo é filtrar o envío de partes de accidentes e enfermidades de orixe laboral a comunicacións que teñen como consecuencia actuacións por parte da Administración.

 

En concreto, as empresas deberán unicamente comunicar á Administración:

. Mortes de traballadores ou terceiras persoas a causa da actividade da empresa.

. Accidentes graves de traballadores (encóntranse definidos nunha lista).

. Accidentes de traballadores con baixa laboral superior a 7 días (antes, 3).

. Sucesos perigosos acontecidos en industrias de risco especial.

. Sucesos domésticos orixinados por instalacións domiciliarias de gas.

 

Elimínase especificamente a obriga de realizar partes oficiais referentes a:

. Enfermidades profesionais distintas ás causadas por axentes biolóxicos no traballo.

. Accidentes non graves de traballadores.

. Sucesos perigosos acontecidos en sectores non considerados de risco especial.

. Accidentes ou enfermidades sufridas por traballadores autónomos.

O propio HSE aclara que aparte están os procedementos corporativos de realización de informes de accidentes/enfermidades que deben facer as empresas. O RIDDOR refírese aos partes oficiais de empresas e autónomos á Administración.

A aplicación destas medidas supoñerá que anualmente se tramitarán 70.000 expedientes menos e un aforro estimado de 1,8 millóns de Libras.

 

Que pode supoñer esta modificación?

Pois o máis probable é que se aproveite a nova situación de notificación de accidentes para rebaixar os requirimentos de seguridade nas empresas e se fomente a subcontratación de traballadores autónomos (exentos de realizar partes de accidentes e enfermidades). Así o máis probable é que aumenten os factores de risco laboral de traballadores en equipo e sobre todo de autónomos.

 

Fontes: www.aragonvalley.com, David Mairal

www.guardian.co.uk