Co financiamento de:
/ Medio ambiente

As rías do norte de Galicia teñen carecterísticas diferentes ás do resto desta comunidade

04-02-2013 - MEDIO AMBIENTE

Os resultados dun proxecto de investigación coordinado polo Consello Superior de Investigacións Científicas (CSIC) sobre a oceanografía, a bioxeoquímica e o plancton nas rías galegas situadas ao leste de cabo Ortegal e a súa plataforma continental próxima permitiron establecer, por primeira vez dende o punto de vista oceanográfico, as características das rías do norte de Galicia.

Sobre a base de todos os datos obtidos, e comparando os patróns oceanográficos das rías de Galicia, pódese afirmar que as rías do norte forman un grupo a parte dentro de rías galegas debido ás súas características oceanográficas e aos procesos bioxeoquímicos que nelas teñen lugar.

"Tratouse dunha investigación ambiciosa e ampla, pois abranguemos aspectos complementarios de oceanografía física, química e biolóxica. Polo tanto, supuxo un forte impulso no coñecemento das rías do norte de Galicia, as grandes esquecidas. Realizouse cun enfoque pluridisciplinar e multi-institucional, polo que os resultados ofrecen á comunidade científica unha visión conxunta sobre esas rías de Galicia e orixinan un coñecemento de referencia para detectar futuros cambios ambientais", explica Ricardo Prego, profesor de investigación do CSIC no IIM e coordinador do proxecto.

Os científicos realizaron campañas oceanográficas nas tres rías e a súa zona costeira adxacente a bordo dos buques oceanográficos Lura (IEO) e Mytilus (CSIC), recolleron mostras fluviais en cinco ríos (Lourido, Landoi, Mera, Sor e Landro) e de chuvia na estación meteorolóxica de estaca de Bares e nas depuradoras de Ortigueira e Viveiro. Tamén extraeron mostras de sedimento dende a desembocadura dos citados ríos ata a isóbata de 100 metros de profundidade e de mexillón e algas dentro das rías.

Estas accións, realizadas cunha periodicidade quincenal (augas doce), mensual (augas mariñas) ou semestral (sedimento e biota), permitiron obter a tempo real perfís de salinidade, temperatura, penetración de luz e fluorescencia. Ademais, nas mostras recollidas, os científicos determinaron o seu contido en osíxeno disolto, sales nutrientes, materia orgánica disolta e particulado, metais, clorofila, fitoplancto. En canto ás mostras de sedimento, obtiveron a súa composición mineralóxica e mediron o seu contido en materia orgánica, metais e terras raras (escandio, itrio e trece lantánidos) ".

"Os resultados son relevantes e pioneiros. Por unha parte, confirmamos a nosa hipótese de partida: a hidrografía, os procesos bioxeoquímicos e a riqueza planctónica nas rías do norte de Galicia veñen condicionadas polas achegas fluviais e a mestura invernal da auga costeira máis que polo afloramento, como é o caso das demais rías galegas, as situadas entre os cabos Ortegal e Silleiro. Por outra parte, puidemos establecer as principais características que definen ás rías do norte, explica Ricardo Prego (CSIC).

Terras raras na costa

 Outros aspectos novidosos que se abrangueron nestas investigacións foron, por exemplo, a determinación da presenza de terras raras nos sedimentos costeiros e o establecemento da súa relación coa xeoloxía das concas das rías.

Ademais, describíronse por primeira vez dous eventos de afloramento costeiro: un acontecido durante o verán fronte á ría de Ortigueira e outro durante o inverno na costa Norte de Galicia; ademais caracterizouse a auga da corrente cara ao polo (Iberian Poleward Current-IPC ou corrente de Nadal), que seguindo o noiro continental dobra o noroeste peninsular en outono-inverno e se estableceron os períodos oceanográficos característicos para unha ría do norte de Galicia (a ría do Barqueiro).

Por outra parte, cuantificouse a contribución bioxeoquímica dos ríos que desembocan nas tres rías (Landoi, Lourido e Mera á ría de Ortigueira; Sor á do Barqueiro e Landro á de Viveiro), o que revelou o seu carácter prístino e a influencia da litoloxía local.

"Todo iso permitiunos dispoñer da primeira cuantificación nas tres rías dos intercambios intermareais de nutrientes e metais, así como observar o relevante papel das achegas continentais sobre a proliferación de fitoplancto, como por exemplo, a aparición dunha proliferación de Lingulodinium polyedrum na ría do Barqueiro", afirma Manuel Varela (IEO).

"É importante destacar que as augas dos regueiros Lourido e Landoi se achan enriquecidos en níquel e cromo como consecuencia da mineraloxía do complexo xeolóxico de cabo Ortegal. Agora estamos a estudar como é e ata onde se estende no sedimento costeiro a presenza dos devanditos metais", explica Ricardo Prego (CSIC).

O proxecto, "Influencia do forzamento meteorolóxico, xeoquímica local e zona estuárica na hidrodinámica, ciclo bioxeoquímico de metais traza e transporte de plancto nas rías galegas do norte," estivo liderado polo Grupo de Bioquímica Mariña do Instituto de Investigacións Mariñas (CSIC, Vigo) e financiado pola Comisión Interministerial de Ciencia e Tecnoloxía (CICYT).

Participou a Universidade de Vigo (UVigo), o Instituto Español de Oceanografía (IEO), El Instituto Português do Mar e dá Atmosfera (IPMA) e o Instituto Tecnolóxico para o Control do Medio Mariño de Galicia (INTECMAR), e entre as entidades que colaboraron figura a Delegación Territorial de Lugo da Consellería do Mar (Xunta de Galicia), Augas de Galicia, Aquagest, Meteogalicia e AEMet, así como xeólogos da Universidade de Barcelona e do Instituto "Jaume Almera" (CSIC).

 

Fonte: agenciasinc.es

Empregamos cookies de terceiros para xenerar estatísticas da audiencia (GOOGLE ANALITICS), para o traductor de idiomas (GOOGLE), acollido a “Privacy Shield”.
Se continuas navegando estarás aceitando o seu emprego. Aceptar | Mais información
Confederación Intersindical Galega - Miguel Ferro Caaveiro 10, Santiago de Compostela Versión anterior da páxina Foros Biblioteca Privacidade RSS